Janubiy Koreya sog‘liqni saqlash va farovonlik vazirligi Yaqin Sharq respirator sindromi koronavirusi – MERS bilan zararlangan uchinchi odam halok bo‘lganini tasdiqladi. Bu haqda “RIA Novosti” xabar bermoqda.
Avvalroq, dushanba kuni ushbu virus natijasida ikki kishi halok bo‘lgani haqida xabar berilgan edi.
Bayonotda qayd etilishicha, astma va bakterial pnevmoniyadan aziyat chekkan 82 yoshli Janubiy Koreya fuqarosi koronavirus bilan zararlangan bemorlar bilan birga bir palatada davolanayotgan bo‘lgan. U payshanbaga o‘tar kechasi vafot etgan.
Hozirgi vaqtgacha Janubiy Koreyada MERS’ni yuqtirib olish bilan bog‘liq 36ta holat qayd etildi, ulardan uch nafari vafot etdi. Karantinda bo‘lishi kerak bo‘lgan fuqarolar soni esa 1,3 ming nafarga ko‘paygan. Kasallik oldini olish maqsadida mamlakat bo‘ylab 900dan ortiq maktab va bog‘chalar yopildi.
Chorshanba kuni Janubiy Koreya hukumati koronavirusga qarshi kurash bo‘yicha tezkor guruh tashkil etilganini e’lon qildi. Shuningdek, MERS bilan kasallangan bemorlar yuboriladigan bir qator kasalxonalar belgilab olinishi kutilmoqda. Janubiy Koreya aholisining talabiga qaramay, hukumat hozircha MERS bilan zararlangan bemorlar joylashtirilgan kasalxonalar nomini e’lon qilmayapti.
Izoh (0)