Хитойнинг Шенян шаҳрида истиқомат қилувчи Ган фамилияли шахс қиймати 660 минг юань (106 минг доллар) бўлган автомобилни фақат чақа пуллар эвазига сотиб олди. Бу ҳақда Shanghaiist хабар бермоқда.
Хитойлик харидор автосалонга умумий оғирлиги тўрт тонна, жами 1320 халтачага солинган тангаларни юк машинасида олиб келган. Пулларни дўконга олиб кириш учун 10 нафар сотувчи жалб этилган. Автосалон ичида тангалардан баландлиги тўрт метр бўлган «тоғ» бунёд этилган. Автомобиль қийматининг бир қисмини (20 минг юань ёки 3200 доллар) харидор қоғоз пуллар билан тўлаган.
Ганнинг сўзларига кўра, у автомобилларга ёқилғи қуйиш шохобчасида ишлайди ва ёқилғи олган ҳайдовчилар чойчақа ўрнида ташлаб кетган пулларни автомобиль сотиб олиш учун тўплаб келган. Хитойликнинг сўзларига кўра, тангаларни қоғоз пулларга айлантириш учун мунтазам банкка бориш унинг жонига теккан. 106 минг долларлик автомобилни сотиб олиш учун неча йил пул тўплагани маълум қилинмаяпти. Шунингдек, нашр бу пулга қандай автомобиль сотиб олинганини ҳам билдирмаган.
The Shanghaiist’нинг қайд этишича, хитойлик харидорлар ўз харидлари учун биринчи марта чақа пуллар билан ҳисоб-китоб қилишаётгани йўқ. Масалан, март ойида Фудзян вилоятида истиқомат қилувчи фуқаро янги хонадон учун ҳар бири бир юань бўлган юз минг дона танга берганди.
Изоҳ (0)