Toshkent shahar bojxona boshqarmasi va “Toshkent-Aero” ixtisoslashtirilgan bojxona kompleksi tomonidan Toshkentdagi 1-Respublika tibbiyot kollejida “Odam savdosi: global muammoga qarshi birga kurashaylik!” mavzusida uchrashuv tashkil qilindi, deb xabar beradi O‘zbekiston Respublikasi Davlat Bojxona qo‘mitasi matbuot xizmati.
Toshkent shahar ichki ishlar boshqarmasi, Odam savdosi jabrdiydalariga yordam berish va ularni himoya qilish bo‘yicha Respublika reabilitatsiya markazi va “Istiqbolli avlod” ijtimoiy axborot markazi bilan hamkorlikda o‘tkazilgan mazkur tadbirda kollej talabalari, ustoz-murabbiylar, bojxonachilar va ommaviy axborot vositalari vakillari ishtirok etdi.
Hozirgi paytda yer yuzida 2,7 million nafardan 4 million nafargacha kishilar odam savdosi qurboniga aylangan bo‘lib, ushbu jinoiy faoliyat natijasida jinoyat olami vakillari orttirayotgan daromad miqdori 7—12 milliard AQSh dollarini tashkil qilmoqda. Dunyoning 150 dan ortiq davlatlarini qamrab olgan mazkur global muammo domiga tortilayotganlarning 700—800 mingdan ortig‘i aldov yo‘li bilan chet ellarga olib ketilgan bolalar va ayollardir.
Odam savdosiga qarshi kurashish bo‘yicha birgina “Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda 2014-yil va joriy yilning o‘tgan davri mobaynida 10 ga yaqin qonunbuzilish holati fosh qilingan.
Toshkent shahar bojxona boshqarmasi tomonidan esa o‘tgan yillar davomida ko‘rilgan tezkor qidiruv tadbirlari samarasi o‘laroq, 15 dan ortiq yosh qizlarning ishonchiga kirib, aldov yo‘llari bilan Birlashgan Arab Amirliklari, Turkiya, Rossiya, Hindiston kabi davlatlarga olib chiqib ketib, kelgusida fohishabozlikka majburlashni ko‘zlagan bir guruh shaxslar qo‘lga olinib, O‘zbekiston Respublikasi Jinoyat Kodeksining tegishli moddasi bilan jinoyat ishlari qo‘zg‘atildi.
Qizg‘in davom etgan uchrashuv so‘nggida, kollej talabalariga “Istiqbolli avlod” ijtimoiy axborot markazi tomonidan tayyorlangan va o‘zida odam savdosi bo‘yicha muhim tavsiya va ko‘rsatmalarni aks ettirgan turli tarqatma materiallar tarqatildi.
Izoh (0)