Sudanning amaldagi prezidenti Umar al-Bashir yangi besh yillik muddatga qasamyod qildi. “RIA Novosti” xabariga ko‘ra, inauguratsiya marosimi poytaxt Xartumda, parlament deputatlari qarshisida va arab hamda Afrika mamlakatlari yetakchilari va vakillari guvohligida bo‘lib o‘tdi.
27-aprel kuni Sudan oliy saylov komissiyasi prezident saylovida al-Bashir mutlaq g‘alabaga erishganini e’lon qilgandi. Rasmiy ma’lumotlarga ko‘ra, saylovchilarning 94,5 foizi (5,25 milliondan ortiq saylovchi) amaldagi prezidentni qo‘llab-quvvatlagan.
2011-yili Sudan tarkibidan Janubiy Sudan ajralib chiqib, o‘z mustaqilligini e’lon qilganidan keyingi Sudandagi ilk prezident va parlament saylovlari 2015-yilning 13-16-aprel kunlari bo‘lib o‘tgandi.
Mamlakatning asosiy muxolifat partiyalari hukumat o‘z siyosiy raqiblari, OAV va jamoat tashkilotlariga bosim o‘tkazgani va ta’qib qilgani sababi bilan saylovlarda ishtirok etishdan bosh tortgandi.
Xalqaro jinoyat sudi Darfur shtatidagi nizo sabab insoniyatga qarshi jinoyatlarda ayblagan 71 yoshli al-Bashir 1989-yil 30-iyunidan beri Sudanga rahbarlik qilib keladi. Bungacha u 1996, 2000 va 2010-yillarda prezident sifatida qayta saylangan.
Izoh (0)