Janubiy Koreyada Koronavirus tomonidan kelib chiqqan Yaqin Sharq respirator sindromi (YaSHRS-KoV) bilan kasallangan 18 shaxs bilan muloqotda bo‘lgan 682 kishi karantinga joylashtirildi. “TASS”ning xabar berishicha, yana 33 kishi kasalxonani tark etdi, chunki ikki haftalik muddat ichida ularda kasallik belgilari namoyon bo‘lmadi.
“Janubiy Koreya hududida MERS (YaSHRS-KoV) yuqishi bilan bog‘liq ilk holat qayd etilganidan keyingi 12 kun ichida 18 kishi ushbu kasallik bilan zararlandi”, - deyiladi Sog‘liqni saqlash vazirligi xabarida. Vazirlikdan ma’lum qilishlaricha, virusning mamlakat bo‘ylab tarqalishi oldini olish uchun barcha choralar ko‘riladi, chunki 40 foiz holatda o‘limga olib boradigan bu kasallik mamlakat milliy xavfsizligiga bevosita tahdiddir.
Janubiy Koreya prezidenti Pak Kin Xe esa Vazirlar Mahkamasi a’zolari va o‘z mas’halatchilari bilan o‘ktazgan uchrashuvda MERS’ning butun mamlakat bo‘ylab tarqalishi oldini olish uchun barcha kuchlarni safarbar etish shartligini ta’kidladi. Prezidentning ta’kidlashicha, hukumat ushbu tahdidga vaqtida munosib e’tibor qarata olmadi.
Pak Kin Xe o‘z qo‘l ostidagilariga murojaat qilib, aholi orasida MERS haqida turli vahimali mish-mishlar tarqalishi oldini olish uchun keng miqyosli tushuntirish ishlari olib borilishi shart ekanligini qayd etdi.
Yangi koronavirusli infeksiya ilk bor 2012-yili Saudiya Arabistonida qayd etilgandi. Virus kamida to‘qqiz mamlakatni – Saudiya Arabistoni, Qatar, Iordaniya, Fransiya, Germaniya, Buyuk Britaniya, BAA, Tunis va Italiyani qamrab olgan.
Virus gripp kabi havo-tomchi yo‘li orqali yuqadi. Hozirgi vaqtda MERS-CoV’ga qarshi vaksinalar mavjud emas.
Izoh (0)