Yoshlar o‘rtasidagi Jahon chempionatining O‘zbekiston — Gonduras o‘rtasidagi o‘yindan keyin bo‘lib o‘tgan matbuot anjumanining birinchi qismida O‘zbekiston U-20 terma jamoasi bosh murabbiyi Ravshan Haydarov qatnashdi, deb xabar qiladi “Uff.uz”.
Ravshan Haydarov: Afsuski, chempionatni kutilganidek boshlay olmadik. Uni g‘alaba bilan boshlamoqchi edik. O‘yin boshida yo‘l qo‘ygan xatolarimiz bizga qimmatga tushdi. Ayniqsa, darvozabon va himoyachilar xatosi juda qo‘pol bo‘ldi. O‘yin boshida bizda yaxshi imkoniyat bo‘ldi, ammo biz foydalana olmadik, ular esa foydalandi.
- Ko‘pchilikning fikriga ko‘ra, ikkinchi turdagi Germaniya bilan o‘yin muhimroq edi, shu fikrga qo‘shilasizmi yoki siz boshqacha fikrdamisiz?- Yo‘q. Qaytanga birinchi o‘yin doimo muhim bo‘ladi, chunki birinchi o‘yinda qo‘lga kiritiladigan ochko juda muhim. Bugun xatolarimiz tufayli buni uddalay olmadik. Ular ustida ishlaymiz. Germaniyaga qarshi o‘yin muhim va bu uchrashuv hali o‘z muhimligini yo‘qotmadi. Ularga qarshi o‘yin uchun boshqacha tayyorlanamiz.
- Birinchi turdagi mag‘lubiyat rejalaringizni o‘zgartirib yubormadimi? Umuman jahon chempionatidan nimalarni kutmoqdasiz. Keyingi bosqichga chiqish uchun imkoniyatlarni qanday baholaysiz?- Ha, biroz rejalarimiz o‘zgardi. Germaniyaga qarshi boshqacha tayyorlanamiz. Bugungi mag‘lubiyat yigitlarni yanayam mas’uliyatliroq bo‘lishga undaydi, deb umid qilaman. Hali oldimizda yana ikkita o‘yin bor va ularda ochko olishga harakat qilamiz. Har bir o‘yinning ahamiyati boshqa. Imkoniyatimiz bor. Ulardan foydalanamiz nasib qilsa. Germaniyaga qarshi o‘yin haqida o‘ylash uchun, avvalo bugungi o‘yinni unutishimiz kerak. Xatolarni tahlil qilib, ular ustida ishlab, keyingi o‘yinga boshqacha kayfiyatda tushamiz.
Eslatib o‘tamiz, O‘zbekiston U-20 termasi jahon chempionatining ilk o‘yinida gonduraslik tengqurlariga 3:4 hisobida mag‘lub bo‘ldi.
Izoh (0)