Xalqaro regbi ittifoqi prezidenti Bernard Lapasset 2015-yil 27-may kuni kechqurun Istanbul – Toshkent yo‘nalishi bo‘yicha O‘zbekistonga yetib keldi, deb xabar qiladi O‘zbekiston milliy olimpiya qo‘mitasi matbuot xizmati.
Toshkent xalqaro aeroportida martabali mehmonni O‘zbekiston regbi federatsiyasi rahbariyati, sport jamoatchiligi kutib oldi.
Xalqaro regbi ittifoqi rahbari 28-may kuni Samarqand shahriga tashrif buyurib, bu yerda bolalar regbisini rivojlantirish borasida amalga oshirilayotgan ishlar bilan bevosita tanishib, ko‘xna va hamisha navqiron shaharning muqaddas qadamjolari va diqqatga sazovor joylarida bo‘ladi.
Bernard Lapasset O‘zbekistonga qiladigan besh kunlik tashrifi davomida O‘zbekiston Milliy Olimpiya qo‘mitasi, Madaniyat va sport ishlari vazirligi, Markaziy Osiyo regbi federatsiyasi hamda Respublika regbi federatsiyasi rahbariyati bilan ham uchrashadi.
Xalqaro regbi ittifoqi prezidenti, shuningdek, Toshkentda o‘tkaziladigan Osiyo regbi federatsiyasining ijroqo‘m yig‘ilishida ishtirok etadi. Bundan tashqari, Lapasset O‘zbekiston – Hindiston terma jamoalari o‘rtasida Osiyo chempionati doirasida o‘tkaziladigan uchrashuvni bevosita tomosha qiladi.
Izoh (0)