Халқаро регби иттифоқи президенти Бернард Лапассет 2015 йил 27 май куни кечқурун Истанбул – Тошкент йўналиши бўйича Ўзбекистонга етиб келди, деб хабар қилади Ўзбекистон миллий олимпия қўмитаси матбуот хизмати.
Тошкент халқаро аэропортида мартабали меҳмонни Ўзбекистон регби федерацияси раҳбарияти, спорт жамоатчилиги кутиб олди.
Халқаро регби иттифоқи раҳбари 28 май куни Самарқанд шаҳрига ташриф буюриб, бу ерда болалар регбисини ривожлантириш борасида амалга оширилаётган ишлар билан бевосита танишиб, кўхна ва ҳамиша навқирон шаҳарнинг муқаддас қадамжолари ва диққатга сазовор жойларида бўлади.
Бернард Лапассет Ўзбекистонга қиладиган беш кунлик ташрифи давомида Ўзбекистон Миллий Олимпия қўмитаси, Маданият ва спорт ишлари вазирлиги, Марказий Осиё регби федерацияси ҳамда Республика регби федерацияси раҳбарияти билан ҳам учрашади.
Халқаро регби иттифоқи президенти, шунингдек, Тошкентда ўтказиладиган Осиё регби федерациясининг ижроқўм йиғилишида иштирок этади. Бундан ташқари, Лапассет Ўзбекистон – Ҳиндистон терма жамоалари ўртасида Осиё чемпионати доирасида ўтказиладиган учрашувни бевосита томоша қилади.
Изоҳ (0)