Kuvaytdagi nufuzli turnirda o‘zbekistonlik karatechilar 4 ta medal qo‘lga kiritdi

Karate bo‘yicha O‘zbekiston terma jamoasi Kuvaytda o‘tkazilgan nufuzli Kuwait-open xalqaro turnirida ishtirok etdi, deb xabar qiladi “12news.uz”.

O‘tgan dam olish kunlari yakunlangan musobaqada o‘zbekistonliklar 4 ta medal oldi, ulardan 2 tasi oltin medalidir. Turnirda 35 mamlakatdan tashrif buyurgan karatechilar ishtirok etdi.

Musobaqa shohsupasiga Osiyo chempioni, Guanchjou va Incheondagi Osiyo o‘yinlari sovrindori Barno Mirzayeva ko‘tarildi. Ikkinchi oltin medalni 2013-yilgi Osiyo chempioni, 2011-yilgi jahon chempionatida 6-o‘rin egasi, bir qancha xalqaro turnirlar g‘olibi va sovrindori, 17 yoshgacha bo‘lgan karatechilar orasida O‘zbekistonda eng kuchli hisoblangan Sadriddin Saymatov yutib oldi.

Turnirning bronza medallariga G‘ofurjon Zohidov va Dilnoza Bakirova ega chiqdi. Barcha sovrinlar kumite yo‘nalishi bo‘yicha qo‘lga kiritildi.