Bundan bir oz avval O‘FF rasmiy tvitteri orqali Yangi Zelandiyada bo‘lg‘usi Jahon chempionatiga tayyorgarlik ko‘rayotgan Ravshan Haydarov boshchiligidagi O‘zbekiston U-20 terma jamoasi Panama yoshlariga qarshi nazorat o‘yini o‘tkazib, 1:2 hisobida mag‘lub bo‘lgani haqida xabar berilgandi. Ushbu ma’lumot noto‘g‘ri bo‘lib chiqdi, deb xabar qiladi “Uff.uz”.
O‘zbekiston futbol federatsiyasi rasmiy tvitteri o‘z xatosi uchun uzr so‘rab, quyidagilarni ma’lum qildi:
“Texnik muammo sabab O‘zbekiston yoshlar terma jamoasining Panamaga qarshi o‘yinda mag‘lubiyatga uchraganligi haqidagi xabarni e’tiborsiz qoldirasiz. Yangi Zelandiyadan aloqaga chiqqan O‘zbekiston yoshlar terma jamoasi murabbiylar shtabiga ko‘ra, o‘yin 2:2 hisobidagi durang bilan yakun topgan.
Shu munosabat bilan 1:2 hisobidagi mag‘lubiyat haqida yozilgan tvitni inobatga olmaysiz. Noqulaylik uchun uzr so‘raymiz”, — deyiladi xabarda.
O‘zbekiston futbol federatsiyasi rasmiy saytida berilgan xabarda uchrashuv 2:2 hisobida durang bilan yakunlanganidan keyin ikkala tomonning kelishuviga ko‘ra terma jamoalar penaltilar seriyasida o‘zaro bahs olib borgani aytilgan. Ushbu bahsda O‘zbekiston yoshlar terma jamoasi 5:3 hisobida ustun kelgan.
Eslatib o‘tamiz, O‘zbekiston U-20 yoshlar terma jamoasi Jahon chempionatidagi birinchi uchrashuvini 1-iyun kuni Gonduras yoshlar termasiga qarshi o‘tkazadi.
O‘rtoqlik uchrashuvi
24-may. Velington, Yangi Zelandiya
O‘zbekiston (U-20) — Panama (U-20) — 2:2
Gollar: Sardor Azimov, Eldor Shomurodov
Izoh (0)