Toshkentdagi bolalar—o‘smirlar ixtisoslashtirilgan respublika olimpiya zaxirasi sport maktabida o‘tkazilgan Badiiy gimnastika bo‘yicha Jahon kubogi bosqichi hamda Happy Caravan an’anaviy xalqaro turniri nihoyasiga yetdi, deb xabar beradi O‘zbekiston olimpiya qo‘mitasi matbuot xizmati.
Dunyoning ko‘plab nomdor sportchilari ishtirokida bo‘lib o‘tgan musobaqalarda O‘zbekiston vakilalaridan Anastasiya Serdyukova, Sabina Tashkenbayeva va Nuriniso Usmonova sovrindorlar safidan o‘rin egalladi.
Jahon kubogi bahslarida O‘zbekiston sharafini himoya qilgan Anastasiya Serdyukova bulavada bajariladigan mashqda 17,850 ball bilan uchinchi o‘rinni egalladi. Mazkur musobaqada birinchi o‘rinni rossiyalik Margarita Mamun (19,100 ball) egallagan bo‘lsa, kumush medal Katsyarina Xalkina (Belarus, 17,950 ball)ga nasib etdi.
Umidli yosh gimnastikachilar o‘rtasida o‘tkazilib kelinayotgan Happy Caravan xalqaro turnirida o‘zbekistonlik Sabina Tashkenbayeva bir yo‘la to‘rtta bronza medalga sazovor bo‘ldi. Sabina arqonda sakrash, to‘p va bulava bilan bajariladigan mashqlarda hamda ko‘pkurashda uchinchi o‘rinni egalladi.
Mazkur musobaqalarda ishtirok etgan yana bir o‘zbekistonlik badiiy gimnastikachi Nuriniso Usmonova obruchda bajariladigan mashqda bronza medali sovrindori bo‘ldi.
Izoh (0)