Тошкентдаги болалар—ўсмирлар ихтисослаштирилган республика олимпия захираси спорт мактабида ўтказилган Бадиий гимнастика бўйича Жаҳон кубоги босқичи ҳамда Happy Caravan анъанавий халқаро турнири ниҳоясига етди, деб хабар беради Ўзбекистон олимпия қўмитаси матбуот хизмати.
Дунёнинг кўплаб номдор спортчилари иштирокида бўлиб ўтган мусобақаларда Ўзбекистон вакилаларидан Анастасия Сердюкова, Сабина Ташкенбаева ва Нуринисо Усмонова совриндорлар сафидан ўрин эгаллади.
Жаҳон кубоги баҳсларида Ўзбекистон шарафини ҳимоя қилган Анастасия Сердюкова булавада бажариладиган машқда 17,850 балл билан учинчи ўринни эгаллади. Мазкур мусобақада биринчи ўринни россиялик Маргарита Мамун (19,100 балл) эгаллаган бўлса, кумуш медаль Катсярина Халкина (Беларусь, 17,950 балл)га насиб этди.
Умидли ёш гимнастикачилар ўртасида ўтказилиб келинаётган Happy Caravan халқаро турнирида ўзбекистонлик Сабина Ташкенбаева бир йўла тўртта бронза медалга сазовор бўлди. Сабина арқонда сакраш, тўп ва булава билан бажариладиган машқларда ҳамда кўпкурашда учинчи ўринни эгаллади.
Мазкур мусобақаларда иштирок этган яна бир ўзбекистонлик бадиий гимнастикачи Нуринисо Усмонова обручда бажариладиган машқда бронза медали совриндори бўлди.
Изоҳ (0)