O‘zbekistonda xizmat ko‘rsatgan murabbiy Viktor Vasilyevich Borisov 74 yoshida hayotdan ko‘z yumdi, deb xabar qiladi “Stadion.uz”.
Viktor Borisov 1941-yil 17-oktabrida tug‘ilgan. Futbolchilik faoliyatini “Yangiyer” klubida boshlagan, biroq afsuski, og‘ir jarohat tufayli futbolni erta yakunlashga majbur bo‘lgan.
Murabbiylik faoliyatini “Toshkentkabel” klubida boshladi. 1979-yili Jizzaxning “Bo‘ston” klubini qabul qilib oldi va uni sobiq SSSR chempionatining 1-ligasiga olib chiqdi. Bu yutug‘i uchun “O‘zbekistonda xizmat ko‘rsatgan murabbiy” unvonini oldi.
U “Paxtakor”, “So‘g‘diyona”, “Nasaf” klublari, O‘zbekiston olimpiya va milliy termasida faoliyat yuritdi.
Viktor Borisov faoliyatining eng yuqori cho‘qqisi — O‘zbekiston yoshlar terma jamoasini jahon chempionatiga olib chiqish bo‘ldi. 2003-yilgi JCh final bosqichida yoshlar termasi germaniyalik murabbiy Yurgen Gyodega ishonib topshirildi, Borisov unga yordamchilik qildi. O‘zbekiston yoshlar termasi esa guruhdan chiqa olmadi.
Viktor Vasilyevich Borisov umrining so‘nggi yillarida Rossiyada istiqomat qilgan bo‘lsa-da, uning hayoti va barcha yutuqlari O‘zbekiston bilan chambarchas bog‘liqdir.
O‘zbekiston futbol federatsiyasi va O‘zbekiston futbol faxriylari kengashi murabbiyning olamdan o‘tishi munosabat bilan ta’ziya izhor qildi.
Izoh (0)