Checheniston rahbari Ramzan Qodirov tuman politsiya bo‘linmasi rahbari Najud Guchigov va 17 yoshli Luiza Goylabiyevaning to‘yiga hammani taklif qildi. RBC.ru’ning xabar berishicha, nikoh marosimi Grozniydagi FHDYO bo‘limida bo‘lib o‘tadi. Avvalroq Guchigovning qonuniy nikohda xotini borligi haqida xabar berilgandi.
“Qadrli do‘stlar! Men shu kungacha shahzoda Uilyam va Ketrin Midltonning nikohi asr to‘yi deb hisoblab kelayotgan edim. Biroq, so‘nggi kunlarda sodir bo‘lgan hodisalar aslida Najud Guchigov va Luiza Goybaliyevaning to‘yi asr to‘yi ekanligini tasdiqladi”, - deb yozdi Ramzan Qodirov Instagram’dagi sahifasida.
Checheniston rahbarining rasmiy ma’lumotlarga asoslanib xabar berishicha, to‘yga qiziqish bildirayotgan OAV vakillari soni bir yarim mingdan oshib ketgan, “hatto Avstraliya va Monakodan ham qo‘ng‘iroqlar bo‘lgan”.
“Shunday qilib, ertaga soat 16:45da Grozniy shahar FHDYOsida Najud va Luiza o‘rtasida nikoh qayd etiladi. Hammani to‘yga taklif qilaman!”, - deb yozdi Ramzan Qodirov. Uning so‘zlariga ko‘ra, to‘yning barcha jarayonlari Islom diniga muvofiq va Rossiya qonunchiligiga asoslangan tarzda o‘tkazilmoqda.
Qodirovning qo‘shimcha qilishicha, Najud va Luizaning shaxsiy hayotiga bezbetlarcha aralashib kelgan shaxslar “sud oldida javob berishadi”, ularga qarshi da’volar hozirgi kunda tayyorlanmoqda. “Najud va Luizaga baxt, totuvlik, uzoq yillik shirin hayot tilayman”, - deydi Checheniston rahbari.
Eslatib o‘tamiz, bu to‘y OAVda katta shov-shuvlarga sabab bo‘lgandi. “Novaya gazeta” nashri 17 yoshli qizni aslida qonuniy xotini bo‘lgan erkakka majburan uzatishayotgani haqida yozib chiqqandi. Biroq keyinroq Checheniston rahbari huzuridagi inson huquqlari bo‘yicha kengashi vakili qiz o‘z xohishiga ko‘ra turmushga chiqayotganini tan olgani haqida bayonot bergandi.
Izoh (0)