Чеченистон раҳбари Рамзан Қодиров туман полиция бўлинмаси раҳбари Нажуд Гучигов ва 17 ёшли Луиза Гойлабиеванинг тўйига ҳаммани таклиф қилди. RBC.ru’нинг хабар беришича, никоҳ маросими Грознийдаги ФҲДЁ бўлимида бўлиб ўтади. Аввалроқ Гучиговнинг қонуний никоҳда хотини борлиги ҳақида хабар берилганди.
«Қадрли дўстлар! Мен шу кунгача шаҳзода Уильям ва Кетрин Мидлтоннинг никоҳи аср тўйи деб ҳисоблаб келаётган эдим. Бироқ, сўнгги кунларда содир бўлган ҳодисалар аслида Нажуд Гучигов ва Луиза Гойбалиеванинг тўйи аср тўйи эканлигини тасдиқлади», - деб ёзди Рамзан Қодиров Instagram’даги саҳифасида.
Чеченистон раҳбарининг расмий маълумотларга асосланиб хабар беришича, тўйга қизиқиш билдираётган ОАВ вакиллари сони бир ярим мингдан ошиб кетган, «ҳатто Австралия ва Монакодан ҳам қўнғироқлар бўлган».
«Шундай қилиб, эртага соат 16:45да Грозний шаҳар ФҲДЁсида Нажуд ва Луиза ўртасида никоҳ қайд этилади. Ҳаммани тўйга таклиф қиламан!», - деб ёзди Рамзан Қодиров. Унинг сўзларига кўра, тўйнинг барча жараёнлари Ислом динига мувофиқ ва Россия қонунчилигига асосланган тарзда ўтказилмоқда.
Қодировнинг қўшимча қилишича, Нажуд ва Луизанинг шахсий ҳаётига безбетларча аралашиб келган шахслар «суд олдида жавоб беришади», уларга қарши даъволар ҳозирги кунда тайёрланмоқда. «Нажуд ва Луизага бахт, тотувлик, узоқ йиллик ширин ҳаёт тилайман», - дейди Чеченистон раҳбари.
Эслатиб ўтамиз, бу тўй ОАВда катта шов-шувларга сабаб бўлганди. «Новая газета» нашри 17 ёшли қизни аслида қонуний хотини бўлган эркакка мажбуран узатишаётгани ҳақида ёзиб чиққанди. Бироқ кейинроқ Чеченистон раҳбари ҳузуридаги инсон ҳуқуқлари бўйича кенгаши вакили қиз ўз хоҳишига кўра турмушга чиқаётганини тан олгани ҳақида баёнот берганди.
Изоҳ (0)