AQSH Kongressi quyi palatasi kelasi moliya yili uchun harbiy byudjet miqdorini 612 milliard dollar etib belgilashni nazarda tutuvchi qonun loyihasini qabul qildi. News.Liga.net xabariga ko‘ra, ushbu qonunda Ukrainaga 200 million dollar, xususan, qiruvchi qurol yetkazib berish ko‘rinishida yordam berish ham hisobga olingan.
Hujjatning qabul qilinishini uchun 269 nafar kongressmen ovoz berdi, 151 nafari esa qarshi chiqdi. Biroq Obama ma’muriyati ushbu hujjat prezident imzo qo‘yishi kerak bo‘lgan jarayongacha yetib kelsa, xarajatlar haddan tashqari ko‘pligi sabab veto huquqidan foydalanib, qonunni rad etishi mumkinligini ma’lum qilgan.
Qonunda qayd etilishicha, Pentagon 2016-yil 30-sentyabriga qadar Ukraina hududini chet ellik bosqinchilardan himoya qilish, Ukraina xalqini Rossiya tomonidan qo‘llab-quvvatlanayotgan ayirmachilarning hujumchilaridan himoya va mudofaa qilish, nizoni tugatish maqsadida tinch yo‘l bilan muzokaralar olib borish uchun sharoitlarni yaratish maqsadida Ukrainaga mashg‘ulotlar, uskunalar, mudofaa maqsadlarida foydalaniladigan qiruvchi qurollar, moddiy-texnik, material va xizmatlar ko‘rinishida yordam berishi kerak.
Avvalroq AQSH Senatining mas’ul qo‘mitasi Ukrainaga 300 million dollar miqdorida harbiy yordam ko‘rsatilishini nazarda tutuvchi shunday qonun loyihasini tasdiqlagan edi. Ushbu hujjat bo‘yicha ovoz berish jarayoni yaqin vaqt ichida o‘tkazilishi kutilmoqda.
Izoh (0)