АҚШ Конгресси қуйи палатаси келаси молия йили учун ҳарбий бюджет миқдорини 612 миллиард доллар этиб белгилашни назарда тутувчи қонун лойиҳасини қабул қилди. News.Liga.net хабарига кўра, ушбу қонунда Украинага 200 миллион доллар, хусусан, қирувчи қурол етказиб бериш кўринишида ёрдам бериш ҳам ҳисобга олинган.
Ҳужжатнинг қабул қилинишини учун 269 нафар конгрессмен овоз берди, 151 нафари эса қарши чиқди. Бироқ Обама маъмурияти ушбу ҳужжат президент имзо қўйиши керак бўлган жараёнгача етиб келса, харажатлар ҳаддан ташқари кўплиги сабаб вето ҳуқуқидан фойдаланиб, қонунни рад этиши мумкинлигини маълум қилган.
Қонунда қайд этилишича, Пентагон 2016 йил 30-сентябрига қадар Украина ҳудудини чет эллик босқинчилардан ҳимоя қилиш, Украина халқини Россия томонидан қўллаб-қувватланаётган айирмачиларнинг ҳужумчиларидан ҳимоя ва мудофаа қилиш, низони тугатиш мақсадида тинч йўл билан музокаралар олиб бориш учун шароитларни яратиш мақсадида Украинага машғулотлар, ускуналар, мудофаа мақсадларида фойдаланиладиган қирувчи қуроллар, моддий-техник, материал ва хизматлар кўринишида ёрдам бериши керак.
Аввалроқ АҚШ Сенатининг масъул қўмитаси Украинага 300 миллион доллар миқдорида ҳарбий ёрдам кўрсатилишини назарда тутувчи шундай қонун лойиҳасини тасдиқлаган эди. Ушбу ҳужжат бўйича овоз бериш жараёни яқин вақт ичида ўтказилиши кутилмоқда.
Изоҳ (0)