Arab davlatlari va YuNESKO qadimiy yodgorliklarni himoya qilish majburiyatini oldi

Arab davlatlari YuNESKO bilan hamkorlikda Yaqin Sharqning madaniy va tarixiy merosini himoya qilishga tayyor, deb xabar qiladi “TASS”.

14-may kuni Misr poytaxti Qohirada qadimiy yodgorliklarni asrash mavzusida xalqaro konferensiya o‘tkazildi. Misr, Saudiya Arabistoni, BAA, Iroq, Iordaniya, Kuvayt, Livan, Sudan va Ummon tomonidan imzolangan Qohira deklaratsiyasida mamlakatlar madaniy yodgorliklarning yo‘q qilinishi va o‘g‘irlanishiga qarshi harakat qilish bo‘yicha hamkorlikni kengaytirishga kelishib oldi.

Arab davlatlarini ayniqsa butun mintaqa bo‘ylab haykallarni buzib tashlayotgan ekstremistlar tashvishga solmoqda. IShID jangarilari Iroqning qadimiy Nimrud shahridagi bebaho haykallarni, Suriya va Iroqda islom va xristian ehromlarini buzib tashladi.

Yaqinda Suriya hukumati jahon hamjamiyatini YuNESKO tomonidan butunjahon merosi deb topilgan qadimiy Palmiraning buzilib ketishi xavfi borligidan ogohlantirgandi. So‘nggi xabarlarga qaraganda, IShID jangarilari antik davrning eng mashhur shaharlaridan biri hisoblangan Palmira xarobalaridan 2 kilometr uzoqlikda bo‘lib turibdi.

Shahardagi eng qimmatli yodgorliklar olib ketilgan. Ammo hujum uyushtiriladigan bo‘lsa, me’moriy yodgorliklar va ehromlarni saqlab qolishning imkoni yo‘q.