BMT bosh kotibi Pan Gi Mun Burundida davlat to‘ntarishiga urinishdan keyin yuzaga kelgan vaziyat bo‘yicha xavotir bildirdi, deya xabar bermoqda “TASS”.
Uning ma’muriyati tarqatgan yozma bayonotda Pan Gi Mun “saylangan hukumatni harbiy kuch yordamida mansabdan olishga bo‘lgan” urinishlarni qoraladi va mamlakat konstitutsiyasini hurmat qilishga chaqirdi.
Pan Gi Mun Burundidagi barcha tomonlarni zo‘ravonlikka qarshi chiqish, qasos olishdan tiyilish va o‘z jangarilarining jilovini tortib qo‘yishga da’vat etdi.
Bosh kotib BMT Burundidagi inqirozdan chiqib ketish yo‘llarini mintaqadagi sheriklar bilan qidirishda davom etishiga ishontirdi.
Avvalroq Burundidagi davlat to‘ntarilishi tashkilotchilaridan biri ularning urinishlari muvaffaqiyatsizlikka uchraganini tan olgan edi.
Eslatib o‘tamiz, Afrika qit’asida joylashgan Burundi davlatida harbiy davlat to‘ntarishiga urinish bo‘lgan, keyinroq u bostirilgan edi.
13-maydan 14-mayga o‘tar kechasi politsiya kiyimidagi noma’lum shaxslar ikkita xususiy radiostanisya va telekanalni egallab, general Godfrua Niyombare nomidan Nkurunziza uchinchi marta prezidentlik saylovida ishtirok etish istagini bildirib, Konstitutsiyani buzgani uchun hokimiyatdan chetlatilishi haqidagi murojaatni o‘qib eshittirgan.
O‘sha paytda Tanzaniyada bo‘lib o‘tayotgan Afrika davlatlari rahbarlari sammitida ishtirok etayotgan Burundi prezidenti Pyer Nkurunziza o‘zining Twitter’dagi sahifasida mamlakat aholisini xotirjamlikka chaqirib post joylashtirgan.
14-may, payshanba kuni prezident mamlakatga qaytib kelgan.
Izoh (0)