Tojikistonda o‘zini prezidentning o‘g‘li deb ko‘rsatgan maktab o‘quvchisi javobgarlikdan ozod etildi

O‘zini Tojikiston prezidentining o‘g‘li deb ko‘rsatgan Dushanbedagi xalqaro maktabning 10-sinf o‘quvchisi hibsdan ozod etildi va maktabiga qaytib ulgurdi. Bu haqda Asia-Plus nashri xabar bermoqda.

Korrupsiyaga qarshi kurash va moliyaviy nazorat bo‘yicha agentlik ma’lum qilishicha, 16 yoshli Xushdil Qurbonov 50 ming dollar miqdoridagi zararni qoplagach, “odatiy hayot tarziga qaytdi, ya’ni maktabga qatnay boshladi”.

Manba xabariga ko‘ra, Qurbonov voyaga yetmaganligi, shuningdek o‘z aybini to‘liq tan olganligi sababli jinoiy javobgarlikdan ozod etilgan.

Eslatib o‘tamiz, Xushdil Qurbonov o‘z qarindoshi Jo‘raxon Xolov bilan fuqaro Mahmadrizo Rajabov ishonchiga kirgan va unga 0,30 gektar yer ajratishni va’da qilib, evaziga 50 ming dollar talab qilgan.

Pulni qo‘lga kiritgach, javobgar shaxs Sabzali Majidovga murojaat qilganini aytgan. O‘zi esa bu paytda Majidovga qo‘ng‘iroq qilib, o‘zini prezidentning o‘g‘li Somoni Emomali deb tanishtirgan va Mahmadrizo Rajabovga yer ajratishni buyurgan. Biroq Majidov Xushdil Qurbonovga ishonmagan va hech kimga yer ajratmagan.