Мисрнинг собиқ президенти Ҳусни Муборак суд унинг бўйнига қўйган 125 миллион миср фунти (тахминан 16,5 миллион доллар) миқдоридаги жаримани тўлаганидан сўнг озодликка чиқарилиши мумкин. Бу ҳақда, «Ал-Масри ал-Яум» нашрига асосланиб, ТАСС хабар бермоқда.
Нашр манбаларининг маълум қилишича, Муборак сўнгги бир неча ойдан бери Маъдий ҳарбий госпиталида қолмоқда ва қонун талабларига кўра қамоқхонага хос кўк рангли либосни ечаётгани йўқ.
«Жаримани тўлиқ тўлаб бўлмаганича у ҳибсда сақланади ва озодликка чиқарилмайди. Таъкидлаш керак, жаримани тўлаш жараёни бошланган», - деди жазони ижро этиш бошқармасидаги манбалар.
Бундан ташқари, касалхонанинг қоидаларидан келиб чиққан ҳолда, мамлакатнинг собиқ биринчи хоними Сюзан Муборак эрининг озодликка чиқишини кутган ҳолда у билан бирга касалхонада қолмоқда.
Президент қароргоҳларини таъмирлаш учун ажратилган давлат маблағларини ноқонуний ўзлаштириш ва коррупция иши бўйича 9 май куни бўлиб ўтган такрорий суд маҳкамасида Муборак ва унинг икки ўғли – Аля ва Гамал уч йилга озодликдан маҳрум этилди ва 21 миллион миср фунти (қарийб 3 миллион доллар) миқдорида жаримага тортилди.
Шунингдек, суд уларга 125 миллион миср фунти (тахминан 16,5 миллион доллар) миқдоридаг маблағни давлатга қайтариш мажбуриятини юклади – тергов маълумотларига кўра, улар умумий ҳисобда шунча маблағни талон-тарож қилишган.
13 май куни Миср ИИВнинг жазони ижро этиш муассасалари бўйича ёрдамчиси Ҳасан ас-Сохагий Бош прокуратура Муборакнинг 2011 йил баҳоридан бери ҳибсда ўтказган вақтини озодликдан маҳрум этиш ҳукмига тенглаштирган.
14 май куни прокуратура вакиллари ушбу ахборотни тасдиқлашди ва «Муборак суд томонидан белгиланган озодликдан маҳрум этиш жазосини амалда ўтаб бўлганини ва ортиқ маҳбус ҳисобланмаслигини» маълум қилишди.
«Бироқ, жарима тўланганидан кейингина жазони ижро этиш жараёни тўлиқ бажарилган ҳисобланади», - дея қайд этишди Бош прокуратура вакиллари.
Изоҳ (0)