Minskda Donbass masalasi bo‘yicha aloqa guruhi uchrashuvi boshlandi

Minskda Donbassdagi vaziyatni tartibga solish bo‘yicha aloqa guruhi ishtirokchilarining uchrashuvi boshlandi, deya xabar bermoqda “Vedomosti”.

6-may kuni Belarus poytaxtiga o‘zini mustaqil deb e’lon qilgan “Donetsk” va “Lugansk xalq respublikalari”ning muzokaralardagi vakillari Denis Pishulin va Vladislav Deynego, Ukrainaning aloqa guruhidagi vakili, mamlakat sobiq prezidenti Leonid Kuchma, YXHT vakili Xaydi Talyavini va Rossiya vakili Azamat Qulmuhametov yetib kelgan.

Shuningdek, “Ukrainskiy vibor” jamoatchilik harakati rahbari, Ukraina sobiq prezidenti Leonid Kuchma ma’muriyati boshlig‘i Viktor Medvedchuk ham Minskka kelgan.

“Ligabeznisinform”ning xabar berishicha, o‘tgan bir kun davomida aksilterror hududidagi vaziyat keskinlashgan. Poroshenko ma’muriyatining aksilterror operatsiyasi masalalari bo‘yicha vakili Andrey Lisenkoning so‘zlariga ko‘ra, kamida besh nafar ukrainalik harbiy halok bo‘lgan.

Shuningdek, 12 nafar ukrainalik harbiy yaralangan. Bloomberg o‘tgan bir kunni Ukraina tomoni uchun aprel o‘rtalaridan beri kuzatilgan eng og‘ir damlar, deb atadi.