Qozog‘istondagi navbatdan tashqari prezident saylovida g‘alaba qozongan Nursulton Nazarboyev chorshanba kuni xalq oldida qasamyod qildi va davlat rahbari vazifasini bajarishga kirishdi. Bu haqda Newskaz.ru xabar bermoqda.
Obyektlarni mudofaa qilish xizmati harbiy xizmatchilari marsh sadolari ostida inuaguratsiya marosimini o‘tkazish zaliga Qozog‘iston davlat bayrog‘i, prezident shtandarti va respublika konstitutsiyasini olib kirishgan.
Prezident etib saylangan Nazarboyev Qozog‘iston xalqiga qasamyod qilarkan, o‘ng qo‘lini konstitutsiyaga qo‘yib, qozoq tilida shunday dedi: “Qozog‘iston xalqiga sadoqat bilan xizmat qilishga, respublikaning Konstitutsiyasi va qonunlariga qat’iy rioya etishga, fuqarolarning huquqlari va erkinliklariga kafolat berishga, Qozog‘iston Respublikasi Prezidenti zimmasiga yuklatilgan vazifalarni vijdonan bajarishga tantanali qasamyod qilaman”.
Qasamyod qabul qilganidan so‘ng prezident lavozimiga kirishgan Nazarboyev davlat bayrog‘iga yaqinlashib, uning old tomonini o‘pgan. Shundan so‘ng Qozog‘iston madhiyasi ijro etilgan, Oqo‘rda ustida Qozog‘iston bayrog‘i ko‘tarilgan.
Shundan so‘ng Qozog‘iston Markaziy saylov komissiyasi raisi Quvandiq Turganqulov Nazarboyevga uning prezident ekani haqidagi guvohnomani topshirgan. Nazarboyev marosimda nutq o‘qigan, shundan so‘ng Qozog‘iston Qurolli kuchlari tomonidan tashkil etilgan paradni qabul qilgan.
Xabar berishlaricha, inauguratsiya marosimidan so‘ng artilleriya to‘plaridan tantanali ravishda o‘q uzilgan.
Izoh (0)