Қозоғистондаги навбатдан ташқари президент сайловида ғалаба қозонган Нурсултон Назарбоев чоршанба куни халқ олдида қасамёд қилди ва давлат раҳбари вазифасини бажаришга киришди. Бу ҳақда Newskaz.ru хабар бермоқда.
Объектларни мудофаа қилиш хизмати ҳарбий хизматчилари марш садолари остида инуагурация маросимини ўтказиш залига Қозоғистон давлат байроғи, президент штандарти ва республика конституциясини олиб киришган.
Президент этиб сайланган Назарбоев Қозоғистон халқига қасамёд қиларкан, ўнг қўлини конституцияга қўйиб, қозоқ тилида шундай деди: «Қозоғистон халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Қозоғистон Республикаси Президенти зиммасига юклатилган вазифаларни виждонан бажаришга тантанали қасамёд қиламан».
Қасамёд қабул қилганидан сўнг президент лавозимига киришган Назарбоев давлат байроғига яқинлашиб, унинг олд томонини ўпган. Шундан сўнг Қозоғистон мадҳияси ижро этилган, Оқўрда устида Қозоғистон байроғи кўтарилган.
Шундан сўнг Қозоғистон Марказий сайлов комиссияси раиси Қувандиқ Турганқулов Назарбоевга унинг президент экани ҳақидаги гувоҳномани топширган. Назарбоев маросимда нутқ ўқиган, шундан сўнг Қозоғистон Қуролли кучлари томонидан ташкил этилган парадни қабул қилган.
Хабар беришларича, инаугурация маросимидан сўнг артиллерия тўпларидан тантанали равишда ўқ узилган.
Изоҳ (0)