Qozog‘istondagi navbatdan tashqari prezident saylovida g‘olib chiqqan Nursulton Nazarboyevning inauguratsiyasi 29-aprel kuni bo‘lib o‘tadi. Bu haqda “RIA Novosti” xabar bermoqda.

“1995-yil 26-dekabrda qabul qilingan “Qozog‘iston Respublikasi prezidenti to‘g‘risida”gi konstitutsiyaviy qonunning 2-moddasi 3-bandiga muvofiq, Markaziy saylov komissiyasi (MSK) 2015-yil 29-aprelni navbatdan tashqari prezident saylovida g‘olib chiqqan Nursulton Abishevich Nazarboyevning qasamyod qabul qilish kuni sifatida belgilash haqida qaror qabul qiladi”, - dedi MSK kotibi Baxit Meldeshov.

MSK a’zolari tomonidan ma’qullangan qarorga asosan, Nursulton Nazarboyev Qozog‘iston prezidenti sifatida ro‘yxatga olinadi. 29-aprel kuni esa Nazarboyevga uning Qozog‘iston prezidenti ekanligi haqidagi tegishli guvohnoma topshiriladi.

Eslatib o‘tamiz, 26-aprel, yakshanba kuni Qozog‘istonda navbatdan tashqari prezident saylovi bo‘lib o‘tdi. Unda uch nomzod – amaldagi prezident Nursulton Nazarboyev, Kommunistik xalq partiyasi rahbari Turg‘un Sizdikov va Kasaba uyushmalari federatsiyasi raisi Abelg‘azi Kusainov prezidentlik uchun kurashdi.

Ovoz berish jarayonida rekord darajada ko‘p – saylovchilarning 95,21 foizi ishtirok etdi. MSKning yakuniy ma’lumotlariga ko‘ra, saylovchilarning 97,75 foizi Nursulton Nazarboyev nomzodiga ovoz bergan.