Жаҳон ёввойи табиат жамғармаси (WWF) жаҳон океани ресурсларини 24,2 триллион долларга баҳолади. Бу ҳақда «Корреспондент.net» хабар бермоқда.
Жамғарма вакилларининг маълум қилишларича, бу анча қисқартирилган кўрсаткич, чунки кўплаб табиий ресурсларни пул эквивалентига ўтказиб бўлмайди.
«Ҳар йили жаҳон океани инсониятга «етказиб бераётган» маҳсулот ва хизматларнинг тахминий баҳоси 2,5 триллион долларга тенг. Агар бу рақамни жаҳон океанининг ялпи ички маҳсулоти сифатида қабул қиладиган бўлсак, у АҚШ, Хитой, Япония, Германия, Франция ва Буюк Британиядан сўнг еттинчи иқтисодиёт бўларди», - дейилади жамғарма пресс-релизида.
Ҳозирги вақтда ифлослангани, ҳаддан ташқари кўп балиқ овланаётгани, кўплаб балиқ ва жониворларнинг ҳаёт маконлари бузилгани, шунингдек, маржонларнинг скелетлари бузилиб кетишига сабаб бўладиган океан суви ҳарорати ва кислоталилик даражаси ошиши натижасида океаннинг саломатлиги оғир аҳволда турибди.
«Агар океан ҳарорати ҳозирги ўсишда давом этса, мисол учун, 2050 йилга бориб маржон қоялари бутунлай йўқолиб кетади», - дейилади пресс-релизда.
Ҳозирги вақтда жаҳон балиқ ресурсларининг 90 фоизи ё қайта тикланиш имконияти чегарасида овланмоқда (61 фоиз), ёки керагидан ортиқ овланиб бўлган (29 фоизи), дея қайд этмоқда WWF.
Аввалроқ, яқинда Австралияда сайёранинг ўзига хос экотизими – Катта маржон қояларни сақлаб қолиш бўйича режа тақдим этилган эди. Унга иқлим ўзгариши, кимёвий чиқиндилар ва тупроқ ейилиши таҳдид солмоқда. Тадқиқотчиларнинг маълумотларига кўра, маржон қояларнинг ярми сўнгги 30 йилда йўқ бўлиб кетди.
Изоҳ (0)