Venada bo‘lib o‘tadigan 2015-yilgi Eurovision xalqaro musiqa tanlovi boshlanishiga bir oy qolganida, ushbu tanlovning 40 ishtirokchisidan 24tasi Amsterdamda har yili an’anaviy tarzda tashkil etiladigan eng katta “Eurovision in Concert” promo-konsertida ishtirok etdi. “Korrespondent.net”ning xabar berishicha, shou 18-aprel oqshomida Melkweg klubida bo‘lib o‘tgan.
Bu konsert muxlislarga tanlov arafasida ko‘plab ishtirokchilarning jonli ijrodagi imkoniyatlariga baho berish, ishtirokchilarning o‘ziga esa xalqaro bellashuv arafasida jonli ijro borasidagi tajribani oshirish imkonini beruvchi bir tadbirdir. Konsert Eurovision’ning ta’sischisi – Yevropa eshittirishlar ittifoqiga aloqador bo‘lmasa-da, Eurovision ijrochi prodyusseri Yon Ula Sann ham konsertda mehmon bo‘ldi.
2009-yildan beri birinchi marta Amsterdamdagi konsertda Germaniya vakilasi ishtirok etdi. “Black smoke” qo‘shig‘ini kuylab chiqqan 24 yoshli Ann Sofi konsertdagi muhitdan haqiqiy zavq olganini tan oldi. Asli ukrainalik, lekin bu safar Moldova nomidan Eurovision’da ishtirok etadigan Eduard Romanyuta esa “I want you love” qo‘shig‘ini ijro etdi, tanlovda esa faqat g‘oliblikni o‘ylayotganini yashirib o‘tirmadi.
Serbiyalik Boyana Stamenova “Beauty never lies” qo‘shig‘i bilan konsert ixlosmandlarini rostmana uyg‘ota olgan bo‘lsa, Gollandiya vakilasi Treynte Osterxeys tushunarli sabablarga ko‘ra eng ko‘p olqishlar egasiga aylandi – u “Walk Along” nomli kompozitsiya bilan chiqish qildi.
Bukmekerlarning so‘nggi taxminlariga ko‘ra, Amsterdamdagi “Eurovision in Concert”da chiqish qilganlar orasida Shvetsiya, Avstraliya, Sloveniya, Norvegiya, Ozarbayjon va Buyuk Britaniya Venada o‘tadigan Eurovision’da g‘oliblik uchun asosiy da’vogar sifatida ko‘rilmoqda.
Izoh (0)