Gollivud aktrisasi Gvinet Peltrou 29 dollarga bir hafta yashay olmadi. Bu haqda Newskaz.ru xabar bermoqda.
Aktrisa hafta boshida ovqatni faqat maxsus talonlari orqali sotib olib, bir hafta yashab ko‘rish haqidagi qarorini e’lon qilgandi.
AQSHda kam ta’minlangan fuqarolarga beriladigan bir haftalik oziq-ovqat talonlari qiymati 29 dollarga (bir marta ovqat olish qiymati 1,38 dollarga) teng bo‘lib, Peltrou bu pulga bir qadoq qoramtir guruch, qora loviya, tuxum va sabzavotlar sotib olgan.
Aktrisa shu yo‘l bilan ehtiyojmand oilalar oziq-ovqat talonlari yordamida qanchalik kam mahsulot sotib olishlarini ko‘rsatib bermoqchi bo‘lgan. “Oldindan taxmin qilganimdek, biz faqat to‘rt kun bardosh bera oldik va shundan so‘ng men chidolmay, tovuq va yangi sabzavotlar sotib oldim”, - deb yozdi aktrisa goop.com saytidagi blogida.
Peltrou “bunday kichik byudjet bilan sog‘lom, oqsillarga boy taomlar bilan oziqlanish juda ham qiyinligi”ni qayd etib, “47 million amerikalik har kuni, har hafta, har yili shu muammoga duch kelishi”ni aytib o‘tgan.
Ma’lumot uchun, 1998-yili eng yaxshi ayol roli uchun “Oskar” mukofoti bilan taqdirlangan aktrisa Gvinet Peltrou AQSHda oziq-ovqat dasturini moliyalashtirish 2013-yildan beri ikki barobar qisqartirilganiga jamoatchilik e’tiborini qaratishni maqsad qilgan ijtimoiy aksiyada ishtirok etmoqda.
Izoh (0)