O‘zbek Milliy akademik drama teatrida O‘zbekiston xalq artisti Yoqub Ahmedov tomonidan yangi “Aktyorlik mahorati maktabi” teatr-studiyasi tashkil etildi. Bu haqda 12news.uz xabar bermoqda.
“Milliy akademik drama teatrida yoshlar bilan ishlaydigan, o‘g‘il-qizlarimizga milliy teatr san’atidan saboq berib, ularni xalq xizmatiga jalb etadigan studiya tashkil etildi”, - dedi Yoqub Ahmedov.
Adabiyotshunos Shuhrat Rizayevning fikricha, yetakchi aktyorlarning tajribasidan samarali foydalanish maqsadida tashkil etilgan ushbu yangi teatr-studiya ijodiy jarayonning mukammallashishiga ko‘mak beradi.
“Bu yerda iqtidorli aktyorlar, shuningdek, viloyat teatr jamoalarining yosh a’zolari teatr ustalaridan ko‘p narsalarni o‘rganishlari, ular bilan bir sahnada rollar ijro etishlari mumkin bo‘ladi”, - dedi Shuhrat Rizayev.
Yoqub Ahmedov tomonidan tashkil etilgan studiyada 16-22 yosh oralig‘idagi, o‘rta maxsus va oliy ta’lim muassasalarida ta’lim olayotgan iqtidorli yoshlar saboq olishadi.
Ma’lumot uchun, hozirgi vaqtda O‘zbekistonda 37 ta teatr faoliyat olib bormoqda.
Izoh (0)