Венада бўлиб ўтадиган 2015 йилги Eurovision халқаро мусиқа танлови бошланишига бир ой қолганида, ушбу танловнинг 40 иштирокчисидан 24таси Амстердамда ҳар йили анъанавий тарзда ташкил этиладиган энг катта «Eurovision in Concert» промо-концертида иштирок этди. «Корреспондент.net»нинг хабар беришича, шоу 18 апрель оқшомида Melkweg клубида бўлиб ўтган.
Бу концерт мухлисларга танлов арафасида кўплаб иштирокчиларнинг жонли ижродаги имкониятларига баҳо бериш, иштирокчиларнинг ўзига эса халқаро беллашув арафасида жонли ижро борасидаги тажрибани ошириш имконини берувчи бир тадбирдир. Концерт Eurovision’нинг таъсисчиси – Европа эшиттиришлар иттифоқига алоқадор бўлмаса-да, Eurovision ижрочи продюссери Йон Ула Санн ҳам концертда меҳмон бўлди.
2009 йилдан бери биринчи марта Амстердамдаги концертда Германия вакиласи иштирок этди. «Black smoke» қўшиғини куйлаб чиққан 24 ёшли Анн Софи концертдаги муҳитдан ҳақиқий завқ олганини тан олди. Асли украиналик, лекин бу сафар Молдова номидан Eurovision’да иштирок этадиган Эдуард Романюта эса «I want you love» қўшиғини ижро этди, танловда эса фақат ғолибликни ўйлаётганини яшириб ўтирмади.
Сербиялик Бояна Стаменова «Beauty never lies» қўшиғи билан концерт ихлосмандларини ростмана уйғота олган бўлса, Голландия вакиласи Трейнте Остерхейс тушунарли сабабларга кўра энг кўп олқишлар эгасига айланди – у «Walk Along» номли композиция билан чиқиш қилди.
Букмекерларнинг сўнгги тахминларига кўра, Амстердамдаги «Eurovision in Concert»да чиқиш қилганлар орасида Швеция, Австралия, Словения, Норвегия, Озарбайжон ва Буюк Британия Венада ўтадиган Eurovision’да ғолиблик учун асосий даъвогар сифатида кўрилмоқда.
Изоҳ (0)