Kanadalik taniqli xonanda Jastin Biber qo‘riqchilar bilan mushtlashganidan so‘ng Kaliforniyadagi mashhur Coachella musiqiy festivalidan haydaldi. Bu haqda “TASS” xabar bermoqda.
Hodisa o‘tgan yakshanba kuni, Biber reper Dreyk kuylayotgan zalga kirishga uringan vaqtda sodir bo‘lgan. Festivalning qo‘riqlash xizmati xodimlari zalda bo‘sh o‘rinlar qolmagani sabab, Jastin Biberni ichkariga kiritmagan.
Biber esa “olomon ichida turish o‘zi uchun xavfsiz emasligi”ni ro‘kach qilib, zalga kiritishlari hamda qo‘shimcha o‘rin bilan ta’minlashlarini talab qilavergan.
Xonandaga yordamga kelgan festival xodimlaridan biri uni olib kirib ketmoqchi bo‘lganida, qo‘riqchi Biberning yo‘lini to‘sib, unga nisbatan jangovar usul ishlatgan.
Natijada katta mojaro kelib chiqqan va 21 yoshli Biber festivalni tark etishga majbur bo‘lgan. Xabar berishlaricha, hozirgi vaqtda xonanda o‘ziga nisbatan kuch ishlatgan qo‘riqchilarni sudga berish harakatida.
Ma’lumot uchun, 1999-yildan beri o‘tkazib kelinadigan Coachella musiqiy festivali Kaliforniyadagi eng mashhur va xalqaro darajada yuqori maqomga ega festival hisoblanadi. 2014-yili festival doirasida 580 mingta chipta sotilgan, 78 million dollardan ortiq daromad olingan.
Izoh (0)