Rossiyaliklarning yarmi Putin bilan to‘g‘ridan-to‘g‘ri muloqotni “xo‘jako‘rsinchilik” deb atadi

Rossiyaliklarning 46 foizi to‘g‘ridan-to‘g‘ri muloqot chog‘ida Rossiya prezidenti Vladimir Putinga hech qanday savol berishni istamagan bo‘lardi, chunki ular ushbu teledasturni “xo‘jako‘rsinchilik” deb hisoblaydi va u biror narsani yaxshi tomonga o‘zgartira olishiga ishonmaydi. Bu haqda “Jamoatchilik fikri” fondining ijtimoiy so‘rovi natijalariga tayanib, Meduza xabar berdi.

So‘rov 11—12-aprel kunlari Rossiyaning 43 ta mintaqasida 1500 nafar respondentlar o‘rtasida o‘tkazildi.

Fond prezidenti Aleksandr Oslon so‘zlariga ko‘ra, Putinga hech qanday savol berishni istamagan fuqarolar orasida prezidentga salbiy munosabatda bo‘lganlar ham, o‘z muammolari prezidentlik darajasida emasligini tushunadigan kishilar ham, shuningdek o‘z savollarini ifodalab bera olmaydigan fuqarolar ham bor.