Icelandair aviakompaniyasining Reykyavikdan Denverga parvoz qilayotgan yo‘lovchi samolyoti tumshuq qismi yashin urishi natijasida teshilib qoldi. Meduza.io’ning xabar berishicha, Boeing 757 layneri havoga ko‘tarilishidan ko‘p o‘tmay unga yashin urilgan.
Uchuvchilar yo‘riqnomaga muvofiq laynerning barcha tizimlarini tekshirib chiqib, hech bir nosozlik topishmagan va parvozni davom ettirishgan. Yo‘lovchilarga samolyotga yashin urilganini ma’lum qilingan va ular hayotiga hech qanday xavf yo‘qligi ta’kidlangan.
Uchuvchilarning o‘zi samolyot aynan qanday shikastlanganini Denverga yetib kelinganidan so‘ng tushunib yetishgan. The Denver Post’ning yozishicha, samolyot ta’mirlash uchun topshirilgan.
Zararlangan layner Islandiyadagi vulqonlardan biri sharafiga Xerdyubreyd deb ataladi. Ma’lumot uchun, Icelandair’ning barcha samolyotlari vulqonlar sharafiga nomlangan.
Izoh (0)