AQSH Xitoyning Janubi-Sharqiy Osiyoda olib borayotgan siyosatidan xavotirda. Prezident Barak Obamaning ma’lum qilishicha, Xitoy qo‘shni mamlakatlar bilan mavjud hududiy bahslarni kuch bilan hal qilishga urinmoqda.
“TASS”ning xabar berishicha, Barak Obama bu haqda Yamaykaga tashrifi davomida aytib o‘tgan. Yamaykada Obama mamlakat rahbariyati bilan uchrashdi, shuningdek, mahalliy yoshlar oldida chiqish qildi.
“Biz Xitoy har doim ham xalqaro normalar va odob qoidalariga rioya etmayotgani, hududiy ustunligidan foydalanayotgani va boshqa mamlakatlarni mute holatga tushirish uchun mushaklarini ko‘z-ko‘z qilayotganidan xavotirdamiz”, - dedi Obama AQSHning Xitoyga nisbatan siyosati haqidagi savolga javob berarkan.
Janubiy Xitoy va Sharqiy Xitoy dengizlaridagi orollar sabab Xitoy va unga qo‘shni mamlakatlar o‘rtasida yuzaga kelgan nizolar haqida to‘xtalarkan, AQSH prezidenti “bu masalalarni diplomatik yo‘l bilan hal qilish mumkinligi”ga ishonch bildirdi.
“Filippin va Vyetnamning hududi Xitoynikidan ancha kichkina ekanligi ularni siltab tashlash mumkinligini anglatmaydi”, - deya qo‘shimcha qildi Obama.
Izoh (0)