Icelandair авиакомпаниясининг Рейкьявикдан Денверга парвоз қилаётган йўловчи самолёти тумшуқ қисми яшин уриши натижасида тешилиб қолди. Meduza.io'нинг хабар беришича, Boeing 757 лайнери ҳавога кўтарилишидан кўп ўтмай унга яшин урилган.
Учувчилар йўриқномага мувофиқ лайнернинг барча тизимларини текшириб чиқиб, ҳеч бир носозлик топишмаган ва парвозни давом эттиришган. Йўловчиларга самолётга яшин урилганини маълум қилинган ва улар ҳаётига ҳеч қандай хавф йўқлиги таъкидланган.
Учувчиларнинг ўзи самолёт айнан қандай шикастланганини Денверга етиб келинганидан сўнг тушуниб етишган. The Denver Post'нинг ёзишича, самолёт таъмирлаш учун топширилган.
Зарарланган лайнер Исландиядаги вулқонлардан бири шарафига Хердюбрейд деб аталади. Маълумот учун, Icelandair’нинг барча самолётлари вулқонлар шарафига номланган.
Изоҳ (0)