O‘z vaqtida Shimoliy va Janubiy Amerikani ajratib, Tinch va Atlantika okeanlarini birlashtirib turgan bo‘g‘oz 13-15 million yil oldin, ya’ni, shu vaqtgacha taxmin qilinganidan 10 million yil avval yopilgan. “TASS”ning xabar berishicha bu boradagi tadqiqot natijalari Science jurnalining so‘nggi sonida e’lon qilingan.
AQSHning Andes universiteti vakili Kamilo Montesaiz boshchiligidagi tadqiqotchilar guruhi Shimoliy And tog‘laridagi sakkiz quduq va ikki geologik yoriqdan olingan tog‘ jinslari namunalarini o‘rganib chiqdi.
Tadqiqot shuni ko‘rsatdiki, Andning miotsen davri (23,03-5,33 million yil avval)ga oid tog‘ jinslarida Panamadan oqib kelgan, sirkoniyga boy cho‘kindilar bor.
Andning nisbatan qadimgi tog‘ jinslarida, xususan, miotsenning boshi va oligotsen davriga (33,9-23,03 million yil avval) oid qatlamlarida Panamadan oqib kelgan moddalar topilmagan.
Olimlar xulosasiga ko‘ra, o‘rta miotsen davriga oid Panama cho‘kindilari 13-15 million yil avval daryo oqimlari orqali Shimoliy Amerikadagi kichik dengizlar havzasiga oqib kelgan. Bu esa, Tinch va Atlantika okeanlarini birlashtiruvchi bo‘g‘oz aynan shu davrda yo‘qolganini bildiradi.
Tadqiqotchilar xulosasi Karib dengizi va Tinch okeani suvlari o‘rtasidagi faol almashinuv taxminan 11 million yil avval to‘xtab qolgani haqidagi boshqa tadqiqot ma’lumotlariga mos keladi.
Tadqiqot mualliflarining qayd etishlaricha, agar ularning xulosalari to‘liq isbotlanadigan bo‘lsa, mutaxassislar o‘rganilayotgan hududdagi iqlim o‘zgarishlari sabablariga qarashlarini qayta ko‘rib chiqishlari kerak bo‘ladi.
Izoh (0)