Fransiya janubida halokatga uchragan A320 laynerining ikkinchi uchuvchisi Andreas Lubits samolyot kapitani kabinani tark etishi uchun uning ichimligiga qasddan siydik haydovchi vosita qo‘shib qo‘ygan. Bu haqda “ITAR-TASS”ga asoslanib “Segodnya.ua” xabar bermoqda.
24-mart kuni Fransiya janubida, Nitsadan shimolroqdagi Din-le-Ben manzilgohida Germanwings aviakompaniyasining Barselonadan Dyusseldorfga parvoz qilayotgan Airbus A320 layneri halokatga uchragan edi.
A320ning ikkinchi “qora qutisi” ma’lumotlari ikkinchi uchuvchi Andreas Lubits samolyotni qasddan yer tomon yo‘naltirgani haqidagi taxminlarni tasdiqladi.
Keyinroq ma’lum bo‘ldiki, Lubits kabinaga kirish eshigini qulflagan, qulf parolini esa o‘zgartirgan va, katta ehtimol bilan, samolyot avtopilotini erkin qulash rejimiga sozlab qo‘ygan.
Kapitanning samolyot yer bilan to‘qnashguniga qadar kabinaga kirish uchun barcha urinishlari samarasiz yakunlangan.
Avval to‘plangan turli ma’lumotlarga ko‘ra, Lubits ko‘rish qobiliyatining yomonlashgani sabab davolanayotgan bo‘lgan, shuningdek, og‘ir ruhiy zo‘riqishdan aziyat chekkan. Bundan tashqari, u depressiya holatida bo‘lgan bo‘lishi ham mumkin.
Izoh (0)