Eron o‘ziga nisbatan joriy etilgan sanksiyalar bekor qilinmagunicha o‘z yadroviy dasturi bo‘yicha yakuniy bitimni imzolamaydi. Bu haqda, “TASS”ning xabar berishicha, Eron prezidenti Hasan Ruhoniy ma’lum qilgan.
“Barcha sanksiyalar o‘sha kunning o‘zidayoq bekor qilinmas ekan, biz hech qanday bitimni imzolamaymiz. Biz yadroviy masala bo‘yicha muzokaralarga jalb etilgan barcha tomonlar uchun o‘zaro manfaatli kelishuv bo‘lishini xohlaymiz”, - deya qayd etdi Ruhoniy.
Ayni vaqtda, AQSh sanksiyalarni bosqichma-bosqich bekor qilishni yoqlab chiqmoqda. “AQSh prezidenti ma’muriyatining sanksiyalarni birinchi kundanoq, boricha bekor qilib yuborish to‘g‘ri emasligiga ishonchi komil”, - dedi Oq uy matbuot kotibi Josh Ernest.
Avvalroq, 2-aprel kuni Shveysariyaning Lozanna shahrida Eron va uning yadroviy dasturi yuzasidan olib borilgan muzokaralarda ishtirok etgan “oltilik” mamlakatlari bir to‘xtamga kelishgani qayd etilgandi.
O‘shanda, AQSh ma’muriyati vakili “Eron yadroviy dasturini to‘xtatish bo‘yicha harakatlarni qanchalik tez amalga oshirsa, sanksiyalar ham shunchalik tez bekor bo‘lishini” ta’kidlagandi.
Izoh (0)