Ukraina Oliy Radasi natsistik va kommunistik rejimlarni qoralovchi, shuningdek, ularning ramzlarini taqiqlovchi qonunni qabul qildi. Bu haqda Meduza nashri xabar bermoqda.
Qonunga muvofiq, Ukrainada natsistlar va kommunistlar rejimining jinoiy jihatlarini omma oldida inkor etish taqiqlandi. Ushbu tuzumlarning ramzlaridan suvenir mahsulotlar tayyorlashda ham foydalanish mumkin emas.
Qonunda qayd etilishicha, ushbu hujjat “Ukraining suvereniteti, hududiy yaxlitligi va milliy xavfsizligiga nisbatan yuzaga keladigan tahdidlarni bartaraf etishga” yo‘naltirilgan.
Ushbu qonun talablarini buzgan shaxslar besh yilgacha ozodlikdan mahrum etish bilan jazolanishi ko‘zda tutilgan.
Ma’lumot uchun, 2014-yili Ukraina Adliya vazirligi mamlakatda Kommunistik partiyani taqiqlash haqida sudga da’vo kiritgan edi. Ushbu ish bo‘yicha sud mahkamalari hali yakuniga yetganicha yo‘q.
Aprel oyi boshida esa Ukraina Kommunistik partiyasi yetakchisi Pyotr Simonenko, Rossiya Kommunistik partiyasining Moskvada bo‘lib o‘tgan qurultoyida ishtirok etganidan so‘ng, Ukraina xavfsizlik xizmati (UXX) tomonidan so‘roqqa tutilgandi.
UXXning ma’lum qilishicha, partiya mamlakatda yuz bergan terrorchilik harakatlariga aloqadorlikda gumon qilinib, tekshirilgan.
Izoh (0)