Yevropa Kengashi Ukrainaning Qrim bilan birgalikdagi hududiy yaxlitligini qo‘llab-quvvatlaydi. Bu haqda, “Segodnya.ua”ning xabar berishicha, Belgiya tashqi ishlar vaziri, Yevropa Kengashi Vazirlar qo‘mitasi raisi Didye Reynders Moskvada Rossiya tashqi ishlar vaziri Sergey Lavrov bilan birga bo‘lib o‘tgan matbuot anjumanida aytib o‘tdi.
“Biz Minsk kelishuvlarining hayotga tatbiq etilishi ustida faol ish olib bormoqdamiz. Ukrainadagi vaziyatga to‘xtaladigan bo‘lsak, bu yerda Yevropa Kengashi o‘z rolini o‘ynashi mumkin. Bu rol yaqin bir necha oy davom etishi shart bo‘lgan prinsipial muhim muhokama bilan, ya’ni, Qrimning o‘ziga xos holati bilan bog‘liq. Bu o‘rinda Yevropa Kengashi Ukrainaning hududiy yaxlitligi va suverenitetiga kafolat berishni istardi”, - dedi Reynders.
Uning ta’kidlashicha, Yevropa Kengashi Ukrainadagi amaliy islohotlarga ko‘mak berishga tayyor va bu jabhada Venetsiya komissiyasi faol rol o‘ynashi mumkin, chunki bunda Ukraina hokimiyati desentralizatsiyasi va konstitutsiyaviy islohotlar nazarda tutilmoqda.
“Bu yo‘ldan olg‘a yurish uchun barcha ukrainaliklarni jalb etish lozim”, - dedi u.
Reyndersning qayd etishicha, Yevropa Kengashi hamda Yevropada xavfsizlik va hamkorlik tashkiloti (YXHT) Ukrainada amalga oshirilgan barcha jinoyatlar, xususan, Maydan va Odessada yuz bergan qotilliklarning jazosiz qolmasligi yo‘lida harakat qilishi kerak.
Ma’lumot uchun, Qrimni o‘z tarkibiga qo‘shib olgani va Donbassdagi ayirmachi kuchlarni qo‘llab-quvvatlayotgani sabab G‘arb mamlakatlari Rossiyaga nisbatan sanksiyalarni joriy etgandi.
Izoh (0)