Aznur Travel sayyohlik kompaniyasi 2-aprel, payshanba kuni Toshkentga 2 ta yangi ikki qavatli avtobuslarni olib keldi, deya xabar bermoqda “Gazeta.uz” kompaniya direktori Ulug‘bek Nurmatovga tayanib.
Ushbu dabldekerlar poytaxtda qatnayotgan ikkita avtobusga qo‘shimcha ravishda ekskursiya yo‘nalishida ishga tushiriladi.
Higer markasidagi avtobuslar Shanxaydan “Tashkent city tour” yozuvi, O‘zbekiston sayyohlik logotipi va sakkizta davlat (audiogid tillari soniga ko‘ra) bayroqlari tushirilgan holda o‘zlari yurib keldi. Ayni paytda ular bojxonada rasmiylashtirilmoqda.
Eslatib o‘tamiz, 2015-yil 17-yanvardan Toshkentda ilk ikki qavatli ekskursiya avtobuslari qatnay boshladi. Aznur Travel sayyohlik kompaniyasi turlar tashkilotchisi hisoblanadi.
Avtobuslar maxsus audiotizim bilan jihozlangan. Sayyohlar audioturni sakkizta — ingliz, nemis, rus, o‘zbek, fransuz, ispan, yapon va xitoy tillarida tinglashi mumkin. Avtobuslar shuningdek imkoniyati cheklangan kishilar uchun maxsus panduslarga ega.
Aznur Travel kompaniyasi bunday dabldekerlar umumiy sonini 15 tagacha yetkazib, Samarqand va Buxoroda ham qo‘shimcha ekskursiya yo‘nalishlarini ochmoqchi.
Izoh (0)