Rossiya prezidenti matbuot kotibi Dmitriy Peskov “Rosneft” rahbari Igor Sechinning iste’foga chiqqani va Vladimir Putinning xastaligi haqida mish-mishlar paydo bo‘lganini bahorgi “xuruj davri” bilan izohladi, deb yozadi Meduza.
“Bahor kelib, quyosh chiqishi bilan, bahor nafas esishi bilan “xuruj davri” boshlanadi. Kimningdir xayolida Sechin iste’foga chiqadi, yana kimdir hukumat iste’fosini tushida ko‘radi, yana ba’zilar esa bir necha kunlab televizorda prezident Putinni ko‘rmaydi”, — dedi Dmitriy Peskov.
Eslatib o‘tamiz, avvalroq Vladimir Putin 6-martdan buyon omma oldiga chiqmagani, so‘nggi bor prezident 5-mart kuni — Italiya bosh vaziri Matteo Rensi bilan uchrashuvda jurnalistlar qarshisida namoyon bo‘lgani xabar berilgan edi.
11-mart kuni Reuters Qozog‘iston hukumatidagi manbasiga tayanib, Ostonadagi uchrashuv bo‘lmasligini xabar qilgan edi. “Tashrif bekor qilindi, Putin kasal bo‘lib qolganga o‘xshaydi”, — degan edi agentlik o‘z manbasiga tayanib.
Rossiya prezidenti matbuot kotibi Dmitriy Peskov Vladimir Putinning xastaligi haqidagi xabarlarni rad etdi. Peskov Bloomberg agentligiga Putin mutlaq sog‘lom ekanligini ma’lum qildi.
Izoh (0)