Vladimir Putin 6-martdan buyon omma oldiga chiqqani yo‘q, deya xabar bermoqda “RBK”. So‘nggi bor prezident 5-mart kuni — Italiya bosh vaziri Matteo Rensi bilan uchrashuvda jurnalistlar qarshisida namoyon bo‘lgan.
6-mart va undan keyingi kunlarda Putin faqat yopiq uchrashuvlar o‘tkazdi, ularda faqat mansabdorlar ishtirok etib, OAVlar taklif qilinmadi.
10-mart kuni, Kreml saytidagi xabarga ko‘ra, Putin Yamal-Nenets avtonom okrugi gubernatori Dmitriy Kobilkin bilan uchrashgan. Biroq nashrning Kremldagi manbalari ta’kidlashicha, o‘sha kuni Kobilkin Kremlga kelmagan.
11-mart kuni prezident matbuot xizmati davlat rahbarining Kareliya gubernatori Aleksandr Xudilaynen bilan uchrashuvi haqidagi ma’lumotni chop etdi. Biroq Kareliyadagi gazetalar 5-mart kuniyoq 4-martga rejalashtirilgan ushbu uchrashuv amalga oshmaganini yozgan edi.
Prezident matbuot kotibi Dmitriy Peskov har ikkala gubernator bilan uchrashuv ko‘rsatilgan vaqtlarda bo‘lib o‘tganini ta’kidladi.
11-mart kuni Reuters Qozog‘iston hukumatidagi manbasiga tayanib, Ostonadagi uchrashuv bo‘lmasligini xabar qilgan edi. “Tashrif bekor qilindi, Putin kasal bo‘lib qolganga o‘xshaydi”, — degan edi agentlik o‘z manbasiga tayanib.
Rossiya prezidenti matbuot kotibi Dmitriy Peskov Vladimir Putinning xastaligi haqidagi xabarlarni rad etdi. Peskov Bloomberg agentligiga Putin mutlaq sog‘lom ekanligini ma’lum qildi.
Izoh (0)