28-fevral kuni o‘ldirib ketilgan muxolifatchi siyosatchi Boris Nemsov Donbassda Rossiya harbiylari borligi haqidagi dalilni oshkor qilishni rejalashtirgan. Bu haqda Ukraina prezidenti Pyotr Poroshenko “112 Ukraina” telekanali efirida aytib o‘tdi, deb yozadi “RBK”.
“Kimdir bundan juda qo‘rqdi. Boris qo‘rqmadi, biroq jallodlar qo‘rqdi. Ular uni o‘ldirdi”, — deya qo‘shimcha qildi Ukraina yetakchisi.
Eslatib o‘tamiz, Boris Nemsov Moskva vaqti bilan 27-fevral 23:15 da (Toshkent vaqti bilan 28-fevral 01:15 da) Moskva markazidagi Moskvoretskiy ko‘prigida otib o‘ldirildi.
Ichki ishlar vazirligi rasmiy vakili so‘zlariga ko‘ra, Nemsov qiz do‘sti bilan ko‘prikdan o‘tayotgan mahal oq rangli mashinadan unga qarata oltita o‘q otilgan. Shulardan to‘rttasi muxolifatchiga kelib tekkan. Qotillik chog‘ida siyosatchining yonida bo‘lgan qiz — 23 yoshli ukrainalik model Anna Duritskaya o‘z ko‘rsatmalarini berib bo‘ldi.
1-mart kuni siyosatchi aksilinqiroz marshida ishtirok etishi kerak edi. Marsh talablari qatoridan Ukraina bilan urushni zudlik bilan to‘xtatish, muxolifatni televideniyega qo‘yish, byudjetni markazlashmagan tizimga o‘tkazish, harbiy xarajatlarni qisqartirish evaziga sog‘liqni saqlash va ta’limga sarf qilinadigan mablag‘ni oshirish kabilar o‘rin olgan edi.
Izoh (0)