“TVS” telekanali siyosatchi Boris Nemsovning Moskva markazida o‘ldirilishini muhrlagan kuzatuv kamerasi yozuvini e’lon qildi, deya xabar bermoqda “Rossiyskaya gazeta”. Videoda avtomobillar va odamlar siluetlarini ajratish mumkin.
Videoda Boris Nemsovning hamrohi Anna Duritskaya bilan ko‘prik bo‘ylab yurganini ko‘rish mumkin. Bu orada o‘chib-yonuvchi chiroqlari bor tozalash mashinasi ularga yetib oladi va ularni kameradan to‘sib qo‘yadi. Bir necha soniyadan so‘ng u yerdan yana bir kishi ko‘chaga yugurib chiqadi va avtomobilga o‘tirib jo‘nab ketadi.
Qor tozalash mashinasi voqea joyidan bir necha metr narida to‘xtab turadi. U yerda bitta siluet — taxminlarga ko‘ra, Nemsovning hamrohi qoladi. Shundan so‘ng u haydovchilarga yaqinlashadi va bir necha daqiqa davomida qor tozalash mashinasi ortida turadi.
Bu paytda ko‘prikdan hali-hamon piyodalar o‘tib turadi. Telekanal syujetida ta’kidlanishicha, ba’zilar hech narsa bo‘lmagandek o‘tib ketsa, boshqalari qiziqib, to‘xtagan. Bir kishi Nemsov halok bo‘lgan joyni ko‘zdan kechirib, qor tozalash mashinasiga yugurib keladi, qiz ham mashina yonida turgan edi, so‘ng yana jasad yoniga qaytadi.
23:35 da (Moskva vaqti bilan) bu yerda birinchi avtomobil to‘xtaydi va bir necha soniyadan so‘ng yana jo‘nab ketadi. Qiz voqea joyiga qaytadi, shundan so‘ng yana ikki kishi keladi. 23:37 da yana bir mashina o‘tib ketadi, biroq keskin to‘xtab, yana ortiga qaytadi. Bir qancha vaqt davomida u jinoyat joyi qarshisida turadi.
23:42 da siyosatchi halok bo‘lgan joyga politsiya xodimlari yetib keladi. Ko‘prik tagidan avvalroq qochib qolgan deb taxmin etilayotgan ikki kishi chiqib keladi.
Eslatib o‘tamiz, Boris Nemsov Moskva vaqti bilan 27-fevral 23:15 da (Toshkent vaqti bilan 28-fevral 01:15 da) Moskva markazidagi Moskvoretskiy ko‘prigida otib o‘ldirildi.
Ichki ishlar vazirligi rasmiy vakili so‘zlariga ko‘ra, Nemsov qiz do‘sti bilan ko‘prikdan o‘tayotgan mahal oq rangli mashinadan unga qarata oltita o‘q otilgan. Shulardan to‘rttasi muxolifatchiga kelib tekkan. Qotillik chog‘ida siyosatchining yonida bo‘lgan qiz jabrlanmagan.
Izoh (0)