Prezident Islom Karimov raisligida 24-fevral kuni Oqsaroyda O‘zbekiston Bolalar sportini rivojlantirish jamg‘armasi Homiylik kengashining navbatdagi yig‘ilishi bo‘lib o‘tdi, deya xabar bermoqda O‘zA.
Davlat rahbari o‘tgan yili Jamg‘arma tomonidan amalga oshirilgan ishlar, uning faoliyatini yanada takomillashtirish masalalari xususida atroflicha fikr yuritdi.
O‘zbekiston Bolalar sportini rivojlantirish jamg‘armasi tashkil etilganidan buyon mamlakatimizda 1700 dan ziyod sport obyektlari barpo etildi. Ular zamonaviy sport jihozlari va anjomlari bilan ta’minlandi. Bu, shubhasiz, bolalarning sport bilan muntazam shug‘ullanib, salomatligini mustahkamlashi, yoshlarimizning jahon maydonlarida ulkan yutuqlarni qo‘lga kiritishi, xalqaro miqyosda Vatanimiz nufuzining yanada oshishiga zamin yaratdi.
2014-yilda bolalar sporti obyektlari barpo etish, rekonstruksiya qilish va kapital ta’mirlash ishlari izchil davom ettirilib, 115 bolalar sporti obyekti barpo etildi.
Barcha sport majmualari zamonaviy sport inventarlari va malakali murabbiylar bilan ta’minlanayotgani tufayli ularning qamrovi tobora kengayib bormoqda. Bugun mamlakatimizda 2 milliondan ziyod bola sportning 30 turi bilan muntazam shug‘ullanmoqda. Bitta sport inshootidan o‘rtacha kunlik foydalanish vaqti 9,8 soatni tashkil etmoqda.
Bolalar sporti obyektlari asosan mamlakatimizda ishlab chiqarilgan sport inventarlari va uskunalari bilan jihozlanmoqda. Bugungi kunda 120 turdagi sport inventarlari va uskunalarining 116 tasi mamlakatimiz korxonalarida ishlab chiqarilmoqda.
Izoh (0)