“O‘zbekiston havo yo‘llari” hozircha Rossiyaga muayyan yo‘nalishlar bo‘yicha reyslarni to‘xtatmaydi

Dollarga nisbatan rubl kursining ancha tushib ketgani, Rossiyaning yirik banklariga qarshi sanksiyalar kiritilgani, Rossiya bozorida sayyohlar faolligining tushib ketganligi, shuningdek 2015-yil 1-yanvardan Rossiya hududiga kirib keladigan xorijiy fuqarolar uchun migratsiya qoidalari kuchaytirilgani “O‘zbekiston havo yo‘llari” MAKning Rossiya hududidagi punktlarga uchadigan reyslari sig‘imi va moliyaviy ko‘rsatkichlariga salbiy ta’sir o‘tkazdi. Bu haqda “O‘zbekiston havo yo‘llari” MAK tijorat bo‘limi rasmiy xabariga tayanib, “Anhor.uz” xabar berdi.

Biroq ushbu yo‘nalishlar bo‘yicha umumiy talab tushganligiga qaramay, aviakompaniya hozircha ma’lum bir yo‘nalishlar bo‘yicha parvozlarni to‘xtatmoqchi emas. MAK havo kemalarini kichik sig‘imli kemalarga almashtirish, kam yukli reyslarni onda-sonda bekor qilish kabi xarajatlarni optimallashtirish choralarini ko‘rmoqda.

Nashrning eslatishicha, avvalroq Rossiya OAVlari “O‘zbekiston havo yo‘llari” rubl beqarorligi va reyslar to‘lmayotgani sababli Rossiyaga parvozlarni qisqartirayotgani haqida xabar bergan edi.