28-dekabr, yakshanbaga o‘tar kechasi samolyoti yo‘qolib qolgan Malayziyaning AirAsia kompaniyasi rahbari layner taqdiri haqida turli taxminlarni o‘ylab chiqarmaslikka va qidiruv natijalarini kutishga chaqirdi. Bu haqda Reuters xabar berdi.
Kompaniya rahbari Toni Fernandes AirAsia’dagilar samolyotning qulagan-qulamaganligini bilmasliklarini aytdi va turli farazlarni o‘ylab topmaslikka da’vat etdi. U qidiruv jamoasi samolyotni topishi bilan kompaniya to‘liq ko‘lamda tergov ishlari o‘tkazishini ta’kidladi.
U shuningdek Airbus A320-200 samolyoti tijoriy tashuvlar standartlari bo‘yicha yangi bo‘lganini ma’lum qildi. Layner 2008-yilda sotib olingan va 13 mingdan ortiq reyslarni 23 ming soatlik parvoz davomida amalga oshirgan.
Avvalroq Indoneziya vitse-prezidenti Yusuf Kalla Malayziya samolyoti qulagan bo‘lishi mumkinligini aytgan edi. Indoneziya hukumati esa samolyotni qidirish ishlari qorong‘i tushgani munosabati bilan to‘xtatilganini ma’lum qilgan edi. Bugun, 29-dekabr kuni tongda Indoneziya qirg‘oqlaridagi Yavan dengizida qidiruv ishlari qayta boshlandi.
Eslatib o‘tamiz, 28-dekabrga o‘tar kechasi Indoneziyaning Surabaya shahridan Singapurga yo‘l olgan Malayziyaning Air Asia kompaniyasiga tegishli Airbus 320-200 samolyoti yo‘qolib qoldi.
Indoneziya transport vazirligi vakili so‘zlariga ko‘ra, Jakartadagi havo harakati ustidan nazorat xizmatining layner bilan aloqasi mahalliy vaqt bilan 6:17 (Toshkent vaqti bilan 4:17) da uzilib qolgan.
Samolyotda jami 155 yo‘lovchi bo‘lib, ularning 149 nafari indoneziyalik, uch nafari koreyalik, bir nafari britaniyalik va yana biri malayziyalik.
Izoh (0)