“TASS” xabar berishicha, 2004-yilning 26-dekabrida 9,5 magnitudali zilzila natijasida paydo bo‘lgan to‘lqin Shri-Lanka, Hindiston, Indoneziya, Tailand, Malayziya, Somali va Keniya qirg‘oqlariga yopirildi. Ushbu sunami tufayli 300 mingga yaqin kishi halok bo‘ldi.
2011-yil 11-mart kuni markaziy va shimoli-sharqiy Yaponiyada 9 magnitudali zilzila sodir bo‘ldi. U 15 mingdan ortiq kishining umriga zomin bo‘lgan kuchli sunamini keltirib chiqardi. 6 ming kishi jarohatlandi, yana 2,7 ming kishi bedarak yo‘qolgan deb e’lon qilindi. Sunamining eng dahshatli oqibati “Fukusima-1” AESdagi avariya bo‘ldi. Undan ko‘rilgan zarar 300 milliard dollar deb baholandi.
1960-yilning 22-mayida markaziy Chilining janubiy sohillarida 9,5 magnitudali zilzila sodir bo‘lib, u sunamini keltirib chiqardi. To‘lqin Chili, Yaponiya, Filippin va AQShning Gavayi shtati qirg‘oqlarigacha yetib bordi. Zilzila oqibatida vulqon ham otildi. 6 ming kishi halok bo‘ldi. Zarar hajmi 500 million dollarni tashkil etdi.
1976-yil 17-avgustda Filippinda 7,9 magnitudali zilzila natijasida yuzaga kelgan sunami 5 ming kishini hayotdan olib ketdi. Yana 2 ming kishi bedarak yo‘qoldi, 9,5 ming kishi yaralandi.
1998-yil 17-iyulda Papua — Yangi Gvineya shimoliy qirg‘oqlarida 7,1 magnitudali yer silkinishi o‘zi bilan sunamini keltirdi. Uning natijasida 2 ming kishi halok bo‘ldi, yana 500 nafari bedarak ketdi, 10 ming nafari uysiz qoldi.
Izoh (0)