AirAsia раҳбари йўқолган самолёт ҳақида турли тахминлар ўйлаб чиқармасликка чақирди

28 декабрь, якшанбага ўтар кечаси самолёти йўқолиб қолган Малайзиянинг AirAsia компанияси раҳбари лайнер тақдири ҳақида турли тахминларни ўйлаб чиқармасликка ва қидирув натижаларини кутишга чақирди. Бу ҳақда Reuters хабар берди.

Компания раҳбари Тони Фернандес AirAsia’дагилар самолётнинг қулаган-қуламаганлигини билмасликларини айтди ва турли фаразларни ўйлаб топмасликка даъват этди. У қидирув жамоаси самолётни топиши билан компания тўлиқ кўламда тергов ишлари ўтказишини таъкидлади.

У шунингдек Airbus А320-200 самолёти тижорий ташувлар стандартлари бўйича янги бўлганини маълум қилди. Лайнер 2008 йилда сотиб олинган ва 13 мингдан ортиқ рейсларни 23 минг соатлик парвоз давомида амалга оширган.

Аввалроқ Индонезия вице-президенти Юсуф Калла Малайзия самолёти қулаган бўлиши мумкинлигини айтган эди. Индонезия ҳукумати эса самолётни қидириш ишлари қоронғи тушгани муносабати билан тўхтатилганини маълум қилган эди. Бугун, 29 декабрь куни тонгда Индонезия қирғоқларидаги Яван денгизида қидирув ишлари қайта бошланди.

Эслатиб ўтамиз, 28 декабрга ўтар кечаси Индонезиянинг Сурабая шаҳридан Сингапурга йўл олган Малайзиянинг AirAsia компаниясига тегишли Airbus 320-200 самолёти йўқолиб қолди.

Индонезия транспорт вазирлиги вакили сўзларига кўра, Жакартадаги ҳаво ҳаракати устидан назорат хизматининг лайнер билан алоқаси маҳаллий вақт билан 6:17 (Тошкент вақти билан 4:17) да узилиб қолган.

Самолётда жами 155 йўловчи бўлиб, уларнинг 149 нафари индонезиялик, уч нафари кореялик, бир нафари британиялик ва яна бири малайзиялик.